Hikmət Hacıyev Ukrayna Prezidenti Ofisinin rəhbərinin müavini ilə müzakirələr aparıb

14 Baxış

Ukrayna Prezidenti Ofisi rəhbərinin müavini İqor Jovkva Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev ilə onlayn məsləhətləşmələr aparıb.

Bu barədə Ukrayna Prezidenti Ofisinin rəsmi saytında bildirilir.

Tərəflər COVID-19 pandemiyasının yayılmasına qarşı mübarizə və vətəndaşların peyvəndlənməsi üzrə Ukraynada və Azərbaycanda görülən tədbirləri müzakirə ediblər.

Prezident Ofisi rəhbərinin müavini Ukraynanın suverenliyinin və ərazi bütövlüyünün daim dəstəklənməsinə görə Azərbaycana təşəkkürünü bildirib.

Prezidentin köməkçisi Hikmət Hacıyev 2020-ci ildə təsdiq edilmiş Ukraynanın Milli Təhlükəsizlik Strategiyasında Azərbaycan Respublikasının Ukraynanın strateji tərəfdaşları siyahısına daxil edilməsini yüksək qiymətləndirib. O, Azərbaycanın suverenliyinin və ərazi bütövlüyünün dəstəklənməsində qətiyyətli mövqe tutan Ukraynaya təşəkkürünü bildirib.

Tərəflər Qarabağ regionunda təhlükəsizliklə bağlı cari vəziyyəti müzakirə edib, işğaldan azad olunmuş ərazilərdə infrastrukturun bərpasına Ukraynanın verə biləcəyi töhfə barədə fikir mübadiləsi aparıblar.

İqor Jovkva və Hikmət Hacıyev cari ildə yüksək səviyyəli ikitərəfli dialoqla bağlı növbəti tədbirlər barədə razılığa gəliblər.


Məlumat oxu.az saytından götürülmüşdür.