Agentlik və fiziki qüsurlu şəxslər qarşı-qarşıya: Kim haqlıdır?

4 Baxış

Cəmiyyətdə əlilliyi olan şəxslərin ictimai yerlərdə sərbəst hərəkətində müəyyən çətinliklər yaşanırdı. Hətta bu mövzuda sosial şəbəkələrdə də tez-tez paylaşımlar edilib.

Oxu.Az xəbər verir ki, mövcud problemin həlli istiqamətində də aidiyyəti orqanlar tərəfindən əlilliyi olan şəxslərin ictimai yerlərdə sərbəst, maneəsiz, ən əsası təhlükəsiz hərəkəti təmin etmək üçün bir sıra tədbirlər görülüb.

Lakin buna baxmayaraq, hələ də əlilliyi olan şəxslər mövcud problemlərdən əziyyət çəkir. Əlilliyi olan Qorxmaz Əkbərov Oxu.Az-a açıqlamasında bildirib ki, bu istiqamətdə görülən işlərə ancaq şəhərin əsas küçələrində rast gəlinir:

“Bizi narahat edən əsas problem görülən işlərin yalnız şəhərin mərkəzini əhatə etməsidir. Hələ qəsəbələri demirəm, şəhərdən bir qədər kənara çıxanda bu işlərin heç biri yoxdur. Şəhərin mərkəzində, gözə görünən yerlərdə panduslar quraşdırılır, hər şey müasir standartlara uyğun aparılıb. Mərkəzdən kənarda isə pandusların mailliyinə, keyfiyyətinə diqqət edilmir. Gözdən əllilər üçün quraşdırılan döşəmələr artıq qopub.Hiss olunur ki, bu işlərə nisbətən soyuq yanaşılıb.

Başa düşürük ki, Bakı Nəqliyyat Agentliyi yalnız Bakıya baxır, amma Bakı ətrafı kəndlərdə vəziyyət yaxşı deyil. Əlilliyi olan şəxslər şəhərin mərkəzində gəlib, yaradılan şəraitdən istifadə edə bilməsi üçün bu tədbirlər Bakıdan kənarda da görülməlidir. Hazırda bir-iki qəsəbəyə “Baku Bus” avtobusu ayrılıb ki, əlilliyi olan şəxslər bununla şəhərin mərkəzinə doğru gələ bilirlər.

Lakin digər qəsəbələrdə və şəhərdən bir qədər kənarda hələ də hündür səkilər var, yeraltı keçidlərdə yaşadığımız problemlər qalır. Yeraltı keçidlərdə quraşdırılan panduslar kobud və sərtdir, istifadəyə demək olar ki, yararsızdır. Bunlar bizə kömək yerinə daha da problem yaradır. Əlilliyi olan şəxslərin cəmiyyətə inteqrasiyasına da mane olur”.

Məsələ ilə bağlı Bakı Nəqliyyat Agentliyinin (BNA) mətbuat xidmətinin rəhbəri Mais Ağayev Oxu.Az-ın sorğusuna cavab olaraq bildirib ki, son beş ildə şəhər nəqliyyatında müyəssərliyin təmin olunması üçün də mühüm layihələr icra olunmaqdadır:

“Məqsəd əlilliyi olan şəxslərin sosial inteqrasiyası, onların cəmiyyətin həyatında digər vətəndaşlarla bərabər əsasda dolğun və effektiv iştirakına nail olmaqdır. Məlumat üçün bildirim ki, ümumilikdə son 5 ildə 160-dan çox küçədə pandus quraşdırılıb. Mühüm sosial əhəmiyyət kəsb edən bu layihənin icrası sayəsində əlilliyi olan şəxslərin şəhərin küçə və prospektlərində hərəkəti asanlaşıb. Pandusların mailliyi səkilərə uyğun olaraq 8-10 faiz arasında dəyişir və sürüşməyə davamlı səthdən ibarətdir”.

M.Ağayevin sözlərinə görə, sosial baxımdan vacib hesab edilən digər bir layihə isə “İdeal səki”-dir:

“Bu layihə çərçivəsində səkilərdə hərəkətə maneə yaradan hallar tam olaraq aradan qaldırılır və səki boyunca görmə üzrə əlilliyi olan şəxslərin rahatlığı üçün hiss edilən pilitələr döşənir. Hazırda 7 küçədə səkilər bu formada yenidən qurulub və bu işlər davam etdirilir. Küçə və prospektlərlə yanaşı yeni nəqliyyat infrastrukturlarında da müyəssərliyin təmin olunması vacib faktor olaraq götürülür. Buna misal olaraq “Koroğlu Nəqliyyat Mübadilə Mərkəzini” qeyd etmək olar”.

“Eyni zamanda son 5 ildə sərnişindaşımalarda müyəssərliyin təmin olunması üçün də təbdirlər görülməkdədir. 2015-ci ildən bu günədək paytaxta gətirilən 960-dan artıq avtobusun hamısında pandus mexanizmləri mövcuddur. Ümumiyyətlə, sərnişin avtobusları üçün müəyyən olunan norma və standartlarda müyəssərliyin təmin olunması da var”, – deyə BNA sözçüsü qeyd edib.

Xatırladaq ki, 32 nəfər əlilliyi olan şəxs BNA-da daimi işlə təmin olunub. 

Qeyd edək ki, 1992-ci ildən BMT Baş Assambleyasının qərarı ilə hər il 5 may tarixi Əlillərin Hüquqlarının Müdafiəsi Günü kimi qeyd olunur.


Məlumat oxu.az saytından götürülmüşdür.